Vatnsaflsvirkjanir

Rannsóknir og þekkingarstig

Rannsóknar- og þekkingarstigin segja mest um það hversu vel ígrunduð einstaka tilhögun er. Í rannsóknum á vatnsorku leiða almennar rannsóknir í ljós upplýsingar um rennslisorku. Með forathugun er nánari útfærsla á tilhögun virkjunar og í henni felast m.a. rannsóknir á aðstæðum sem ráða hagkvæmni og áhrifum á umhverfið. Varðandi jarðhita leiða almennar rannsóknir til afmörkunar á jarðhitasvæðum eftir ummerkjum á yfirborði, en í forathugun er leitast við að afmarka líkleg vinnslusvæði og reynt er að meta helstu áhrif á umhverfið. Með forathugun er hlutverki Orkustofnunar í undirbúningi almennt lokið, og virkjunarstaðir tilbúnir til þeirra rannsókna sem þarf vegna hönnunar og rekstraráætlana og þar taka orkufyrirtækin við.

Nánari útlistun á áföngum undirbúningsrannsókna vatnsafls og jarðhita má sjá í skýrslu iðnaðarráðuneytisins: Álit samstarfsnefndar um orkurannsóknaáætlun frá desember 1998.

Möguleg orkuvinnslusvæði

Heildaryfirlit um stóra og meðalstóra orkuvinnslukosti var tekið saman í ritinu Innlendar orkulindir til vinnslu raforku, sem iðnaðarráðuneytið gaf út 1994. Hér á eftir verður farið yfir helstu kosti sem þar eru nefndir. Í þeim tilfellum þegar hagkvæmni er getið, er átt við hvort orkukostnaður er talin verða hár eða lágur í samanburði við þá kosti sem eru tilbúnir til virkjunar. Orðalagið er haft fremur ónákvæmt af ásettu ráði vegna þess hve gögnin sem að baki liggja eru misjöfn. Ennfremur hefur verðþróun erlendis áhrif á þetta mat.